www.albaniantime.ca

Flurans Ilia

I njohur në rrethet shoqërore dhe letrare me emrin Flurka, Flurans Ilia është ndoshta autori më i ri shqipëtar në Kanada. Themi më i ri sepse është ende i panjohur në ‘Republikën e letrave shqipe’, por që me kurajo vazhdon të përpiqet  në realizimin e ëndërrave  dhe dëshirave të tij. Ka lindur në Berat, më 16 Maj 1971. Në moshën 5-vjeçare ishte protagonist në filmin ‘Tomka dhe shokët e tij’; në moshën 10-vjeçare angazhohet në serialin televiziv ‘Agimet e stinës së madhe’ dhe një vit më vonë në filmin ‘Kohë e largët’. Ai ka kaluar një fëmijëri dhe adoleshencë shumë të pasur me aktivitete skenike (si dhe në radio – tv) prej të cilave ruan një numër të konsiderueshëm diplomash nderi.

Gjatë viteve të shkollës së mesme (1986 – 1990) dhe pas saj ka qene tepër i apasionuar pas letërsisë. Lexonte vepra të ndaluara në italisht e frengjisht. Në këtë periudhë shkroi katër novela dhe dhjetëra tregime. Dhjetë fletore të tij ku janë përmbledhur mbi 600 poezi i përkasin të njëjtës periudhë. Provonte të shkruante poezi realiste, surealiste, simboliste, imazhiste, poezi ndjenje, etj., etj…. Nuk boti asnjërën prej tyre.

Viti 1990 e gjeti në trotuaret e Shqipërisë si shumë të rinj të tjerë. Nuk iu dha e drejta për të vazhduar studimet e larta dhe humbi mundësinë për t’u bërë aktor për motivin ‘është i shkurtër, nuk plotëson kriteret’. Për të parën herë shtegtoi për në Greqi dhe u vendos në Athinë prej së cilës nuk u kthye më në atdhe. Viti 1997 e gjeti përfundimisht në Montreal, qytet që ndikoi dukshëm në kulturën e djalit – poet. I vetëm refuzon të tërhiqet prapa duke u ndeshur kështu me fatin e tij dhe realitetin e vështirë.

Me ndihmën e nënës së tij që ende banon në Shqipëri, në Maj të vitit të kaluar botoi librin e parë me poezi ‘Atavizëm’, në korrik  librin e dytë ‘Refleksione’ dhe në Tetor librin e tretë të titulluar ‘Ditë endacake’. Librat janë botuar në qytetin e tij të lindjes, Berat. Ai ndodhet larg nënës dhe vendlindjes dhe malli për të dyja është i madh.

Ky informacion i shkurtër mbi jetën dhe krijimtarinë e këtij artisti të ri i është ofruar gazetës ‘Albanian Time’ nga vëllai i poetit që banon në Toronto. Kemi gjithashtu edhe disa nga poezitë e tij të cilat do t’i botojmë në numrat e ndryshëm të kësaj gazete. Përmëndim se poeti i ri beratas përshëndet ngrohtësisht gazetën tonë si të parën dhe të vetmen gazetë shqipëtare në Kanada me urimin që flaka atdhedashëse e saj të qëndrojë gjithnjë e ndezur. Urojmë të mbeteni të kënaqur!

LETËR NËNËS

Helikopter

kujtimet e mia.

Pistë në mes zjarresh

është prehëri tëndë.

Kjo tokë e bardhë

(shkretëtirë nordike)

më ngjall frikë.

Pentagram

i mrekullueshëm

letrat e tua nënë.

I këndoj në ditët

e mia me ngricë,

në mëngjes

kur zilja e orës

më zgjonë brutalisht

e nga shtrati

më shtyn në ‘traffic’.

I këndoj në mbrëmje

pas një dite të gjatë

e plotë ‘stress’.

Kur nata shpirtit

nisë dhe i flet.

“E dashur nënë

ti ngelesh

kishëza ime e vogël

ku nis e falem çdo natë,

përpara se të bie të fle,

e ëngjëlli-ëndërr

të zbresë fitimtar

mbi shtratë…”

         Shkruar në vitin 2000